أمّا هذه الحكومة و فلتتها ما قد قعت لا بأرض الهند و لا أرض الحبش :

أمّا هذه الحكومة و فلتتها ما قد قعت لا بأرض الهند و لا أرض الحبش :
فيوم متنفذ يزيح مدير عنده نزيه شريف لا لتهمة إلّا لأنه شريف و ما قدر يسرق في وجوده سوا ، قام اتشاكل معه شخصيا و فعل به اقفع و رقده في البيت و جلس يتقنبع هو وبقية السرق في الوزارة براحته ،،

و يوم تتهبّش عصابة على بيت فلان و فيلته و يخرجه السّيد القائد حقوق النّاس ، و يجلس المتنفذين فترة و إن نفوسهم جالسة بتحز لابتزاز صاحب الحق ، و لا محرك لدولة تحاكم و تحاسب المعتدي و السارق ، و بيني و بينكم من لها في روحها فهي رب البيت ، و ” إن كان رب البيت بالدف ضاربا فشيمة أهل البيت كلهم الرقص ” ،،

و يوم يتصور المسؤولين شق طحطيسة السبعين قبال الناس لأجل يبرروا نهب مليارات ، و مسكينة الطحسيسة لافي بطنها و لا في ظهرها هذا الهبش و المهباشة ،،

و يوم نناشد المسؤولين ينقذوا الناس من تجارة و شركات سرق و نهب المواطن المريض في جسده و نفسه و جيبه باسم مستشفيات و مراكز علاج و لا محرك لوزارة الصحة الي نامت نومة أهل الكهف ،،

و يوم نقل لمؤسسة الجرحى و الشهداء الفاسدتين : اتقوا اللّه في أعظم شرايح المجتمع خاصة و السيد القائد ( جعلتُ فداء روحه ) بيوصي و يحثّ و يشدّد على الاهتمام بالجرحى الي بتهملوا علاجهم و أسر الشّهداء الي بتعوزوهم و اليوم خامس شهر بدون رواااتب ،،

و يوم نشتكي مماطلة إغلاق ملفات تهم تلفق لمجاهدين من جهة كبار الدولة الي بيسمعوا الحكاية و كأن ما اوحوا ،،

و يوم تفرض الأوقاف مبالغ طايلة و يجوا صلا الناس يهددوهم لوما سدّدوش … ، و هم داريين لا به معاشات و لا هم يحزنون ،
و مثلهم شركات الكهرباء و المياه حين يجوا يدقدقوا بالورق يشتوا قيمة الخدمات الي ما تسمى خدمات فكهرباء بتتسابق على ارتفاع سعر الكهرباء مسابقات ، و ماء مقطوع ، و الدليل إن الوايتات بتدق و تعنص في الحارات ليل اللّه مع نهاره ،،

و يوم نقل لهم قد به ظاهرة جديدة للشباب إنهم يعلو صوت الغناوي حقهم في السيارات و يفحطوا من جنب جاهل أدوع و إلّا مرة درناء و زغفوا بهم للشارع الثاني و لا من ضابطي لابتهم يشل سياراتهم و يحتجزها في المرور لوما يجي كبارهم و أولياء أمورهم و يتعهدوا بعدم السرعة ،،

و يوم نقل: جوا لفلفوا الكلاب من الشوارع قحّصت الناس و أصبح الكلب يمشي فارد عضلاته تقل ترامب ،،

و يوم نقل هذا قد علي محسن رجع فقد كثر متهبشين الأرضي و الباسطين عليها بقوة السلاح و لا من ضابطي يقل استحوا ردوا حق خلق الله و ما مع الإنسان إلّا حقه ،،

و يوم نقل القضاء فاسد طهّروه فإذا بهم يعينوا الأستاذ تلميذ للتلميذ ،،

و يوم نقل أين الي بيوعدوا المدرس المدبر بالحوافز و بعدين يدفنوا راسهم في التراب و بعدا : عدمنا نص راتب كل أربعة شهر و عدمنا حوافز من صنع خيال المسؤولين ،،

و يوم نقل جوا ابسروا المدارس الخاصة و الحكومية ما بينفضوا جيوب أولياء الأمور ،،

و أمّا حكايا الغرام في المدارس المختلطة و المعاهد بنقل : جوا ابسروا ما بيقع فيها من قصص و حكايا يا غارة الله اقوى يا تقوى ،،

و يوم نقل للمه بتعينوا الي سبق عليهم تهم و تنوموا الشرفاء وسط البيوت و لا به خجل و لا وجل ،،

و يوم نصيح من عقال الحارات و نهب الغاز و بيعه للمطاعم و غيرها ، و المواطن يجلس ياكل احذي ( حاشي من بين احاكي ) لا عاد به حطب و لا به غاز يخبزوا به ،،

و يوم وكيل وزارة يهدي درجة وظيفية لمن يشتي و يخلي له من يشتي و يبعد من يشتي و كأن عفاش جالس بيننا بالمحسوبية حقه و الشللية ،

و يوم مابلا تنتقد فاسد و إلّا سارق قام لك مية جاهل يكفرك و يقل بتسبوا الصحابة حق المسيرة و المسيرة القرآنية بريئة حيث و هي تتبع زيد في الخروج على الظالم وما تتبعش يزيد لكن سقط حرف الياء من الفاسدين وظنوا يزيد زيد ، و حاشا لله أن يكون ابن الطلقاء كابن من كرم الله وجهه ،،

و يوم تقل لــ س من مسؤولي لا تشل ذيه الجبهة عادهو جاهل و وحيد أسرته و لا يعقل و لا يفهم قول السيد القائد: لا افراط و لا تفريط ،،

و يوم نقل شلونا الجن و الحكومة و الوزراء الراقدين ، و الظاهر أن جداتنا دعين علينا بهولاء الراقدين شلتهم القيامة ، ريت و يتبناهم سلمان و يشلهم مع الي قدهم عنده و قدهم هولاك الفاسدين و المرتزقة سوا بسوا ،،
و إلّا ريت و أمهاتهم فلتين الشقران و أكلنهم هم ،،

و يوم نقل للرئاسة و فخامتها اعدلوا و احكموا بالقرآن و اشتحطوا و بلاها صناديق الشكاوي الي ما عاد بيثق في مصداقيتها و جديتها مواطن ، و لكن يبدو أنهم بيرقدوا على غنية فيصل علوي : حرام يا ناس تصحّوني و أنا نايم !!

و يوم تقل … و يوم تقل …. ، و قد طفح القول بالقايل ، و غابت الفعايل ، و السّلام .

أشواق مهدي دومان